2025 թվականի հունվարի 31-ին անցկացվեց սեմինար, որն ուղղված էր բազմաթիվ ԱԹՍ-ների համակարգերի համար ալգորիթմների մշակման ուսումնասիրմանը՝ ներկայացնելով նորարարական լուծումներ դինամիկ միջավայրերում բաշխված գործողությունների իրականացման համար: Սեմինարը ներկայացրեց ԳՆԿԿ կրտսեր հետազոտող Աննա Մանուչարյանը՝ անդրադառնալով ԱԹՍ-ների համատեղ աշխատանքի համար նախատեսված համակարգերի նախագծման մարտահրավերներին։ Դիտարկվեց  անընդհատ փոփոխվող միջավայրում առաջատար գործակալին հետևելով ԱԹՍ-ների կողմից ընդհանուր առաքելության կատարումը:

Քննարկված հիմնական խնդիրներից մեկը  «հետևորդների» կողմից «առաջատարի» շարժման ուղղությունը նախապես չիմանալով վերջինիս հետևելու դժվարությունն էր: Սեմինարի ընթացքում դիտարկվեցին իրական ժամանակում «հետևորդների» հետագծի հարմարեցման հնարավոր տարբերակներ, որոնք թույլ կտան նրանց արդյունավետորեն հետևել «առաջատարին»՝ միաժամանակ խուսափելով խոչընդոտներից և արձագանքելով ճանապարհին հանդիպող շեղումներին:

Քննարկման առանցքում ապակենտրոնացված կառավարումն էր, որտեղ յուրաքանչյուր «հետևորդ» ԱԹՍ լոկալ տեղեկատվության վրա հիմնված անկախ որոշումներ է կայացնում՝  հաշվի առնելով «առաջատարի» դիրքը, իր սեփական դիրքը և առաքելության նպատակակետը: Այս դեպքում «առաջատար» ԱԹՍ-ն, հետևում է նախանշված ուղուն՝ առանց համակարգային հաշվարկների անհրաժեշտության, մինչդեռ «հետևորդները» միմյանցից անկախ հաշվարկում են իրենց հետագծերը և որոշում կոնկրետ առաքելություններ իրականացնողներին:

Անդրադարձ կատարվեց նաև հուսալի հաղորդակցության համակարգերի կարևորությանը՝ դիտարկելով փոխանցվող տեղեկատվության, մասնավորապես «առաջատարի» և «հետևորդների» դիրքերի, առաքելության կոորդինատների դերը ԱԹՍ-ների խմբի անխափան գործունեության ապահովման հարցում:

Այս նորարարական մոտեցումը կարող է  ԱԹՍ համակարգերի ոլորտում նշանակալի առաջընթաց ապահովել՝ ճանապարհ հարթելով  հսկողության, որոնման, փրկարարական և մի շարք այլ ոլորտներում ավելի հարմարվողական, կայուն և ինքնավար առաքելությունների իրականացման համար: