2025 թվականի մարտի 14-ին ԳՆԿԿ-ում կայացավ ուսանողական սեմինարների շարքի իններորդ սեմինարը: Սեմինարի ընթացքում ԳՆԿԿ  ուսնակ Գոռ Արզանյանը ներկայացրեց ռոբոտների կողմից շրջակա միջավայրի ընկալման համակարգերի վերաբերյալ իր հետազոտությունը՝ կենտրոնանալով միաժամանակյա տեղորոշման և քարտեզագրման (SLAM) տեխնոլոգիաների վրա:

Այս միջոցառումը մեր սեմինարների շարունակական շարքի մի մասն է և միտված է ներկայացնելու մեր ուսանողների հետազոտությունները և գիտելիքները տեխնոլոգիական ոլորտում: Սեմինարների այս շարքը հարթակ է տրամադրում ուսանողներին՝ կիսվելու իրենց փորձառությամբ և գիտելիքներով ԳՆԿԿ համայնքի հետ:

Քննարկված առանցքային կետեր

✔️Շրջակա միջավայրի ընկալումը ռոբոտի կողմից

Սեմինարը մեկնարկեց ռոբոտների կողմից շրջակա միջավայրի ընկալման առանձնահատկությունների մասին համապարփակ տեղեկատվությամբ, որում ներառված էին ՝ խնդրի ձևակերպումը և տաքսոնոմիան, ընկալման համակարգի բաղադրիչների դիտարկումը և շրջակա միջավայրի ներկայացման մեթոդների ուսումնասիրումը։

✔️Միաժամանակյա տեղորոշում և քարտեզագրում (SLAM)

Զեկույցի ընթացքում անդրադարձ կատարվեց SLAM համակարգի պատմական զարգացմանը՝ սկսած 1986 թ․ հայեցակարգային ձևակերպումից մինչև ժամանակակից գործարկում, հիմնական կառուցվածքին և տեսողական SLAM-ի առանձնահատկություններին․

✔️Տեխնիկական ուսումնասիրություն. OrbSLAM 3 ալգորիթմի դիտարկում

Խոսնակը ներկայացրեց OrbSLAM 3-ի միջոցով հատկանիշների հայտնաբերման ու  նկարագրության գործընթացը, տեսողական օդոմետրիան, քարտեզագրման համակարգը և այլն։

✔️Փորձարարական արդյունքներ

Քննարկվեցին OrbSLAM 3-ի փորձարկման արդյունքները տարբեր միջավայրերում։ Առավել հատկանշական չափորոշիչներ են աշխատանքը դինամիկ միջավայրերում, վարքագիծը տարբեր լուսավորության պայմաններում, արդյունավետությունը սահմանափակ տեսողական հատկանիշներ ունեցող միջավայրում, տեսախցիկի տրամաչափի ազդեցությունը, արագ պտտման ժամանակ ի հայտ եկող խնդիրները։