Հունվարի 21-ին, ժամը 14։00, ԵՊՀ Մաթեմատիկայի և մեխանիկայի ֆակուլտետում պրոֆեսոր Դիոգո Գոմեսը (KAUST) ներկայացրեց սեմինար, որի ընթացքում դիտարկվեցին միջին դաշտային խաղերում գնի կազմավորման մաթեմատիկական մոդելները և դրանց կիրառությունները։

Սեմինարը կենտրոնացած էր ապրանքային առևտուր իրականացնող ռացիոնալ գործակալների մեծ խմբերի համար գնի կազմավորման մաթեմատիկական մոդելների վրա՝ դիտարկելով միջին դաշտային խաղերի տեսության, օպտիմալ տրանսպորտի և մեքենայական ուսուցման միջև կապերը և կիրառությունները գործնականում:

Շնորհակալություն պրոֆեսոր Գոմեսին՝ իր գիտելիքով և փորձով կիսվելու համար:

Խոսնակի մասին:

Պրոֆեսոր Դիոգո Գոմեսը KAUST-ի կիրառական մաթեմատիկայի և հաշվողական գիտությունների պրոֆեսոր է և 2018 թվականից ղեկավարում է նույն համալսարանի AMCS ծրագիրը: Նրա հետազոտությունները կենտրոնացած են մասնակի դիֆերենցիալ հավասարումների, մածուցիկ լուծումների և միջին դաշտային մոդելների վրա: Ph.D. աստիճան է ստացել 2000թ․-ին (University of California, Berkeley)։ Հետդոկտորական աշխատանք է իրականացրել Փրինսթոնի առաջադեմ ուսումնասիրությունների ինստիտուտում, ապա նաև Տեխասի համալսարանում: